Арганізацыя захоўвае пераемнасць з Беларускай хрысціянскай дэмакратыяй і абапіраецца на сучасную еўрапейскую хрысціянска-дэмакратычную традыцыю. Прынцыповымі застаюцца ўнутраная дэмакратыя, плюралізм і калегіяльнае прыняцце рашэнняў. Сістэма сустаршынства — важны механізм прадстаўніцтва розных поглядаў, размеркавання адказнасці і супольнай працы пры адрозненнях у падыходах. Агульная структура аб’ядноўвае людзей і ініцыятывы, якія ўжо дапамагаюць беларусам, абараняюць іх правы і развіваюць супольнасці, каб зрабіць гэтую працу больш узгодненай і выніковай.

Сустаршынямі абраныя Вольга Алейнік, Ксенія Палуэктава, Віталь Рымашэўскі і Дзяніс Садоўскі. Упершыню ў найноўшай гісторыі хрысціянскіх дэмакратаў сфармаваны парытэтны склад сустаршыняў — дзве жанчыны і двое мужчын.

Злева направа: Вольга Алейнік, Дзяніс Садоўскі, Ксенія Палуэктава і Віталь Рымашэўскі

Служэнне беларусам — у краіне і за яе межамі

«Беларуская салідарнасць / хрысціянскія дэмакраты» аб’ядноўвае практычную дапамогу людзям, развіццё беларускіх супольнасцяў, падтрымку самастойных ініцыятыў і працу над рашэннямі, якія адкрываюць беларусам новыя магчымасці ў Беларусі і за яе межамі.

«Чалавек важнейшы за сістэму: дзяржава, палітычныя і грамадскія структуры павінны служыць чалавеку, абараняць яго правы і дапамагаць яму самастойна будаваць сваё жыццё», — адзначаецца ў дэкларацыі, прынятай на канферэнцыі.

Каштоўнасная аснова арганізацыі — чалавечая годнасць, свабода і адказнасць, салідарнасць, плюралізм і субсідыярнасць — прыняцце рашэнняў як мага бліжэй да людзей, якіх яны датычаць. Дапамога павінна ўмацоўваць самастойнасць чалавека, а падтрымка ініцыятыў — пашыраць іх магчымасці, не пазбаўляючы ўласнага кіравання.

Галоўная задача — падтрымка беларусаў унутры краіны і за яе межамі, абарона іх правоў і прадстаўленне інтарэсаў. Практычная дапамога разглядаецца як неад’емная частка працы дзеля свабоднай, незалежнай і дэмакратычнай Беларусі. Людзі павінны мець магчымасць не толькі атрымліваць падтрымку, але і прапаноўваць уласныя рашэнні, ствараць ініцыятывы і ўплываць на парадак дня.

Прынцып «Ад дапамогі аднаму чалавеку — да рашэння праблемы для многіх» прадугледжвае спалучэнне індывідуальнай дапамогі з працай над сістэмнымі зменамі. Там, дзе з адной перашкодай сутыкаюцца многія, неабходныя збор фактаў, падрыхтоўка прапаноў і змена правілаў або адміністрацыйнай практыкі.

Прыярытэты на 2027–2028 гады

Стратэгічнымі прыярытэтамі вызначаныя абарона незалежнасці Беларусі, супрацьдзеянне гібрыдным пагрозам, спыненне рэпрэсій і вызваленне палітвязняў, абарона свабоды сумлення і рэлігійных супольнасцяў, захаванне беларускай мовы, культуры і нацыянальнай ідэнтычнасці.

Асобная ўвага будзе надавацца падтрымцы беларусаў, якія застаюцца ўнутры краіны, захаванню грамадскіх сувязяў і магчымасцяў бяспечнага ўдзелу з улікам рызык рэпрэсій. Арганізацыя выступае супраць ізаляцыі беларускага грамадства ад Еўропы, за пашырэнне адукацыйных, культурных і прафесійных кантактаў.

Аляксандр Кавалевіч, сябра Рады

Працягнуцца кампанія ў абарону правоў беларусаў у Польшчы і міжнародныя кампаніі салідарнасці з Беларуссю. Сярод практычных задач — развіццё сеткі ўзаемадапамогі, падтрымка былых палітвязняў і сем’яў з дзецьмі, жаночага, моладзевага і сеньёрскага кірункаў, пашырэнне псіхалагічнай дапамогі.

Асаблівы акцэнт зроблены на развіцці грамадскіх і сацыяльных ініцыятыў. Арганізацыя будзе дапамагаць самастойным камандам знаходзіць партнёраў, экспертаў, веды і рэсурсы, падтрымліваць адукацыйныя і культурныя праекты, ствараць магчымасці для новых лідараў. Задача такой падтрымкі — умацоўваць самастойнасць ініцыятыў, а не падпарадкоўваць іх адзінаму цэнтру.

Супрацоўніцтва будзе будавацца як сетка раўнапраўнага партнёрства, у якой каманды захоўваюць уласнае кіраванне і напрамкі дзейнасці. «Нам не трэба аднолькава думаць пра ўсё, каб супрацоўнічаць там, дзе нас аб’ядноўваюць агульныя каштоўнасці і ўзаемная карысць», — падкрэсліваецца ў прынятай дэкларацыі.

Канстанцін Акінчыц, сябра рады і сустаршыня МХД/ БМС

Плануецца пашырэнне магчымасцяў навучання, стажыровак і міжнародных абменаў. Інтэграцыя беларусаў у краінах пражывання павінна спалучацца з захаваннем нацыянальнай ідэнтычнасці, а веды, досвед і сувязі дыяспары — працаваць таксама на падтрымку суайчыннікаў унутры краіны і будучае развіццё Беларусі.

Важнымі задачамі застаюцца супрацоўніцтва дэмакратычных сіл, узмацненне ролі грамадзянскай супольнасці і Платформы палітычных партый, пашырэнне прадстаўніцтва розных супольнасцяў і ўплыву саміх беларусаў на прыняцце агульных рашэнняў.

Прывітанні партнёраў і працяг супольнай працы

Дзмітрый Кучук – старшыня Беларускай партыі «Зялёныя»

З прывітаннямі да ўдзельнікаў і ўдзельніц канферэнцыі звярнуліся депутаты  Еўрапейскага парламента і Сейма Польшчы,   а таксама прадстаўнікі беларускіх дэмакратычных партый — Беларускай партыі «Зялёныя», Беларускай сацыял-дэмакратычнай партыі («Грамада») і Партыі БНФ — Беларускага народнага фронту.  

Папярэдні сустаршыня і сябра рады Аляксандр Паршанкоў

17 кастрычніка таксама адбыліся з’езды «Маладых хрысціянскіх дэмакратаў» і жаночай арганізацыі. На моладзевым з’ездзе абралі новы склад Рады і трох сустаршыняў — Лізавету Жучкову, Уладзіміра Далецкага і Канстанціна Акінчыца, — а таксама зацвердзілі планы дзейнасці. Жаночая арганізацыя падвяла вынікі працы і вызначыла наступныя задачы.

18 кастрычніка праца працягнулася ў тэматычных рабочых групах. Удзельнікі абмяркоўвалі развіццё асобных кірункаў, узаемадапамогу і супольныя праекты. Сеньёрская група вызначала далейшыя крокі па развіцці свайго аб’яднання і падтрымцы беларусаў старэйшага пакалення.

«Беларуская салідарнасць / хрысціянскія дэмакраты» працягвае працу, якая аб’ядноўвае дапамогу канкрэтнаму чалавеку з адказнасцю за беларускую супольнасць і будучыню краіны. Арганізацыя адкрытая да супрацоўніцтва з людзьмі і ініцыятывамі, якія падзяляюць каштоўнасці чалавечай годнасці, свабоды, салідарнасці і незалежнасці Беларусі.

Каментары сустаршыняў

Ксенія Палуэктава

«Была вымушаная пакінуць Беларусь пасля пачатку крымінальнага пераследу за бясплатную псіхалагічную дапамогу пацярпелым ад рэпрэсій 2020 года. У Варшаве працягнула гэтую працу разам з камандай, арганізоўвала трэнінгі для жанчын, дапамагала сем’ям з дзецьмі.

Для гарамадска – палітычнай працы я чалек новы. Вельмі расчароўвала напачатку, калі назірала сваркі і спрэчкі паміж рознымі групамі беларускіх палітыкаў.  Ведаю што шмат маіх сяброў адыйшлі ад актыўнага ўдзелу з гэтай прычыны. Стома і выгаранне не павінны ператварацца ва ўзаемную варожасць. Салідарнасць павінна быць штодзённай практыкай. 

Ксенія Палуэктава, сустаршыня

Была вельмі ўражаная камандай хрысціянскіх дэмакратаў – іх практычнаму падыходу і скіраванасцю на дапамогу людзям і вынікі працы тут і цяпер. Бо людзі ўжо стаміліся чуть вылякія абяцанні каторя неспраўджваюцца. Трэба рабіць хацяб невялікія але дзейсныя крокі каторыя прыносяць выннік і карысць людзям. Буду развіваць жаночы кірунак і працаваць над пераадоленнем стэрэатыпаў, якія перашкаджаюць роўнаму ўдзелу жанчын. Плануем праграму псіхалагічнай падтрымкі актывістаў у эміграцыі і анлайн-кансультацыі для беларусаў унутры краіны з улікам іх бяспекі».

Вольга Алейнік

«За гэтыя гады мы стварылі шырокую сетку міжнародных кантактаў і партнёрстваў. Будзем выкарыстоўваць яе для падтрымкі Беларусі і беларусаў, прыцягнення ўвагі да нашай краіны і арганізацыі міжнародных кампаній салідарнасці.

Працягнем працу з еўрапейскімі інстытуцыямі і міжнароднымі арганізацыямі дзеля спынення рэпрэсій, падтрымкі палітвязняў, свабоды веравызнання і роўнасці правоў жанчын і мужчын. Абарону рэлігійных супольнасцяў мы рэгулярна ўздымалі ў дыялогу з Еўрапейскім парламентам і Еўрапейскай народнай партыяй — гэтую працу будзем узмацняць. Адначасова будзем адкрываць беларусам і беларускам магчымасці пераймаць у еўрапейскіх калег сучасныя практыкі дзяржаўнага кіравання, мясцовага самакіравання і развіцця недзяржаўных арганізацый».

Віталь Рымашэўскі

«Вельмі ўсцешаны тым, што новыя людзі далучаюцца да нашай працы, што беларусы не губляюць надзеі, ствараюць новыя ініцыятывы ў Біларусі і ў эміграцыі. Беларусь — там, дзе ёсць беларусы. Мы застаёмся адным народам — унутры краіны і за яе межамі. Наша задача — служыць беларусам: падтрымліваць людзей у Беларусі  і абараняць  правы беларусаў у выгнанні, дапамагаць суайчыннікам у эміграцыі. Будаваць Беларусь трэба тут і цяпер — праз узаемную падтрымку і супольныя справы.  Гатовыя падтрымаць».

Дзяніс Садоўскі

«Мы таксама разглядаем больш шырокае аб’яднанне розных ідэалагічных плыняў хрысціянскіх дэмакратаў.  Таксама вітаем з’езд які плануюць правесці нашыя калегі і паплечнікі 24 кастрычніка ў Беластоку. 

За два месяцы пастаянных кансультацый паміж нашай камандай і камандай Паўла Севрынца і Георгія Дмітрука зробленыя крокі насустрач, дасягнутая дамоўленасць аб адмове ад узаемных публічных нападак. Працуем над пагадненнем аб супрацоўніцтве. Розныя плыні гістарычна суіснавалі ў беларускай хрысціянскай дэмакратыі. Мы паважаем гэтыя адрозненні, бачым у калегах партнёраў і саюзнікаў, адкрытыя да аб’яднання з захаваннем унутранай дэмакратыі і плюралізму.

Дзяніс Садоўскі, сустаршыня

Спадзяемся ў 2027 год атрымаецца правесці супольную кампанію ўшанавання памяці ахвяр камуністычнага тэрору і палітычных рэпрэсій, абмяркоўваем магчымасць супольнага з’езда дзеля таго каб дзе плыні хрысціянскіх дэмакратаў працавалі больш шчыльна.  Сёння рэпрэсіі не дазваляюць правесці паўнавартасны партыйны з’езд з удзелам сябраў унутры краіны. Наша мэта — разам аднавіць дзейнасць Беларускай хрысціянскай дэмакратыі ў свабоднай Беларусі».

The post У Варшаве адбыўся сход «Беларуская салідарнасць / хрысціянскія дэмакраты» appeared first on Афіцыйны сайт Беларускай Хрысціянскай Дэмакратыі (БХД).

Бел-чырвона-белы сцяг для беларусаў — гэта сімвал дзяржаўнасці, свабоды, годнасці і еўрапейскага выбару. Мы падтрымліваем гэтую ініцыятыву і заклікаем беларусаў, беларускія арганізацыі і ўсіх сяброў Беларусі падпісаць петыцыю і распаўсюдзіць яе.

Падпісаць петыцыю можна тут.

The post Беларуская хрысціянская дэмакратыя падтрымлівае петыцыю за ўсталяванне бел-чырвона-белага сцяга на Грунвальдскім полі appeared first on Афіцыйны сайт Беларускай Хрысціянскай Дэмакратыі (БХД).

У мерапрыемстве ўзялі ўдзел адзін з лідараў БХД Павел Севярынец, святар Георгій Рой, прафесар Павел Церашковіч, прадстаўнік “Асацыяцыі беларускіх бацькоў Літвы” Уладзімір Заранкін, каардынатар БХД у Польшчы Анатоль Міхнавец, а таксама сакратарка віленскай суполкі Валерыя Чарнаморцава.

Сустрэча сабрала каля сарака ўдзельнікаў.

Аднаўленне віленскай суполкі БХД стала важным крокам у кансалідацыі беларускіх хрысціянскіх дэмакратаў у замежжы. Аргкамітэт Партыі працягне працу дзеля ўмацавання беларускай супольнасці, абароны правоў чалавека і падрыхтоўкі да дэмакратычных пераменаў у Беларусі.

The post У Вільні адноўлена дзейнасць віленскай суполкі БХД appeared first on Афіцыйны сайт Беларускай Хрысціянскай Дэмакратыі (БХД).

Падчас сустрэчы ўдзельнікі абмеркавалі сітуацыю ў Беларусі, выклікі жыцця ў выгнанні, лёс палітвязняў, а таксама перспектывы пераменаў. Размова атрымалася шчырай і глыбокай — прагучалі дзясяткі пытанняў пра будучыню краіны, шлях да перамогі і ролю хрысціянскіх каштоўнасцяў у аднаўленні справядлівасці.

Павел Севярынец падзякаваў арганізатарам — у прыватнасці Наталлі Калегавай і камандзе віленскага «Замка» — за цёплую атмасферу і магчымасць адкрытага дыялогу. Паводле ўдзельнікаў, сустрэча стала прасторай падтрымкі, салідарнасці і ўзаемнага ўмацавання.

«Мы — разам. І Беларусь жыве — нягледзячы ні на што!» — гэты настрой аб’яднаў усіх прысутных.

The post Сустрэча з Паўлам Севярынцам у Вільні: размова пра Беларусь, надзею і перамогу appeared first on Афіцыйны сайт Беларускай Хрысціянскай Дэмакратыі (БХД).

Спампаваць

The post Прынята канцэпцыя еўраінтэграцыі Беларусі як стратэгія развіцця і бяспекі appeared first on Афіцыйны сайт Беларускай Хрысціянскай Дэмакратыі (БХД).

Спампаваць

The post Прынята гендарная платформа БХД appeared first on Афіцыйны сайт Беларускай Хрысціянскай Дэмакратыі (БХД).

Платформа заснаваная на прынцыпах хрысціянскай дэмакратыі: годнасці асобы, свабоды і адказнасці, справядлівасці, салідарнасці і субсідыярнасці. Дакумент аналізуе ключавыя выклікі, з якімі сутыкаюцца маладыя беларусы: ад крызісу адукацыі, ідэалагічнага ціску і адсутнасці сацыяльных ліфтаў да эміграцыі, страты сувязі з Беларуссю і недастатковага ўдзелу моладзі ў прыняцці рашэнняў.

МХД прапануюць сем асноўных кірункаў зменаў: сучасную і свабодную адукацыю, падтрымку першага працаўладкавання, рэальнае школьнае і студэнцкае самакіраванне, сістэму падтрымкі моладзевых ініцыятыў, развіццё культуры, мовы і незалежных медыя, палітычны ўдзел моладзі, а таксама паўнавартаснае ўключэнне беларускай моладзі ў эміграцыі ў нацыянальныя дэмакратычныя працэсы.

Асобная ўвага ў платформе надаецца практычным механізмам рэалізацыі: стварэнню Моладзевага савета пры дэмакратычных сілах, сістэме міні-грантаў і ментарства, адукацыйным і медыйным платформам, міжнароднаму супрацоўніцтву і падрыхтоўцы заканадаўчых прапаноў для будучага дэмакратычнага парламента Беларусі.

МХД падкрэсліваюць: беларуская моладзь не павінна быць дэкаратыўным дадаткам да палітычных працэсаў. Яна ўжо сёння з’яўляецца суб’ектам пераменаў і павінна мець рэальнае месца, голас і адказнасць у фармаванні будучыні Беларусі.

Спампаваць

The post Маладыя хрысціянскія дэмакраты распрацавалі Моладзевую платформу БХД/МХД appeared first on Афіцыйны сайт Беларускай Хрысціянскай Дэмакратыі (БХД).

📺 Глядзець відэа:

У новым роліку мы паказваем:
— як выглядае еўрапейскі шлях у рэальнасці — праз інстытуцыйную рэформу, незалежны суд, адукацыю, эканоміку, мясцовае самакіраванне;
— якія канкрэтныя змены патрэбныя Беларусі, каб вярнуцца да развіцця, годнасці і бяспекі;
— як выглядае дарожная карта еўраінтэграцыі на 10–15 гадоў, заснаваная на вопыце Грузіі, Малдовы і Украіны;
— як з дапамогай Праграмы Усходняга партнёрства Беларусь можа ўжо цяпер набліжацца да еўрапейскіх стандартаў.

🤝 Разам мы набліжаем Беларусь да свабоды і еўрапейскай будучыні.

The post 🎥 Новае відэа на YouTube-канале БХД: «Якім можа быць еўрапейскі шлях Беларусі і як да яго прыйсці? (частка 3)» appeared first on Афіцыйны сайт Беларускай Хрысціянскай Дэмакратыі (БХД).

У відэа мы разбіраем, што на самой справе азначае еўрапейская інтэграцыя для беларусаў. Не як палітычны лозунг, а як канкрэтныя змены ў эканоміцы, ахове здароўя, адукацыі, сацыяльнай палітыцы і якасці жыцця.

Мы параўноўваем шлях Беларусі і Польшчы за апошнія 30 гадоў:

Польшча абрала еўраінтэграцыю і павялічыла ВУП у 3 разы,

заробкі выраслі з €300 да €1400–1500,

сотні мільярдаў інвестыцый пайшлі ў інфраструктуру,

сярэдняя працягласць жыцця — на 6–10 гадоў вышэй, чым у Беларусі.

📊 У відэа вы знойдзеце факты, параўнальныя табліцы і простыя тлумачэнні:

што дае далучэнне да ЕС для грамадзян, прадпрыемстваў і рэгіёнаў;

як працуюць сацыяльныя гарантыі і медыцына ў краінах ЕС;

чаму інвестары ідуць туды, дзе ёсць празрыстыя правілы, справядлівы суд і павага да прыватнай уласнасці.

Мы таксама нагадваем: Беларусь — частка еўрапейскай цывілізацыі.
📜 Нашая гісторыя — гэта ВКЛ, магдэбургскае права, адукацыя ў Кракаве і Падуі.
⚖️ Нашы каштоўнасці — гэта годнасць чалавека, свабода сумлення, роля сям’і і салідарнасць — менавіта яны ляжаць у аснове сучаснага Еўрапейскага Саюза.

Еўраінтэграцыя — гэта вяртанне дадому. Гэта шанец жыць лепш у сябе, а не з’язджаць.

📣 Заклікаем паглядзець гэтае відэа ўсім, каму не абыякава будучыня Беларусі.
Будзем удзячныя за прагляд, лайк, каментар і распаўсюд сярод сяброў і калегаў.
Разам мы можам змяніць Беларусь — і вярнуць яе ў супольнасць свабодных, годных і моцных еўрапейскіх нацый.

The post «Еўраінтэграцыя — гэта не пра сцяг, а пра жыццё»: на канале БХД выйшаў новы відэаролік пра практычныя перавагі еўрапейскага выбару appeared first on Афіцыйны сайт Беларускай Хрысціянскай Дэмакратыі (БХД).

Паводле звестак, сабраных журналістамі, толькі ў двух рэгіёнах — на Віцебшчыне і Меншчыне — пасля 1 студзеня 2024 года былі ліквідаваныя ўжо 84 рэлігійныя абшчыны, у тым ліку 55 праваслаўных, 11 рыма-каталіцкіх, а таксама абшчыны пратэстанцкіх, юдэйскіх і мусульманскіх канфесій. Эксперты мяркуюць, што ў агульнанацыянальным маштабе гэта можа азначаць знішчэнне каля 220 суполак — адкат на ўзровень пачатку 2010-х гадоў.

Віталь Рымашэўскі пракаментаваў:

«Рэлігійныя арганізацыі – гэта таксама і сацыяльныя службы, моладзевыя служэнні, ініцыятывы, якія працуюць з групамі рызыкі (з алкаголікамі, наркаманамі). Гэта велізарная частка грамадзянскай супольнасці, якая, на жаль, заўсёды заставалася па-за ўвагай і ейная роля недаацэньвалася нават незалежнымі медыямі, грамадзянскімі супольнасцямі і дэмакратычнымі палітыкамі. Але для Беларусі яны прыносяць неацэнную карысць для развіцця грамадзянскай супольнасці», — падкрэсліў палітык.

Паводле Рымашэўскага, беларуская ўлада імкнецца да мадэлі падпарадкавання рэлігійнага жыцця, падобнай да той, што выкарыстоўваецца сёння ў Расеі:

«У Савецкім Саюзе цэрквы ўспрымалі як ворагаў, і задача ўлады была іх знішчыць. А ў нацысцкай Нямеччыне задача была падпарадкаваць цэрквы і зрабіць іх рэтранслятарам дзяржаўнай прапаганды. І тое ж самае зараз робіць Крэмль. У Беларусі сітуацыя пакуль іншая, але ўлады робяць усё, каб незалежная царква ў Беларусі была знішчаная», — заявіў Віталь Рымашэўскі.

Беларуская Хрысціянская Дэмакратыя нагадвае, што рэлігійная свабода — гэта не толькі права на веру, але і аснова грамадзянскай супольнасці, асабліва ва ўмовах рэпрэсій. Мы заклікаем міжнародную супольнасць, медыя і дэмакратычныя сілы не ігнараваць сістэмную зачыстку рэлігійных ініцыятыў у Беларусі і салідарызавацца з усімі, хто церпіць пераслед па рэлігійных матывах.

📌 Поўны артыкул з каментарыямі даступны на сайце «Белсат»:
https://belsat.eu/87622010/zaczystka-relihii

The post «Улады робяць усё, каб незалежная царква ў Беларусі была знішчаная» — Віталь Рымашэўскі пра «зачыстку» рэлігійных арганізацый пад выглядам перарэгістрацыі appeared first on Афіцыйны сайт Беларускай Хрысціянскай Дэмакратыі (БХД).