Арганізацыя захоўвае пераемнасць з Беларускай хрысціянскай дэмакратыяй і абапіраецца на сучасную еўрапейскую хрысціянска-дэмакратычную традыцыю. Прынцыповымі застаюцца ўнутраная дэмакратыя, плюралізм і калегіяльнае прыняцце рашэнняў. Сістэма сустаршынства — важны механізм прадстаўніцтва розных поглядаў, размеркавання адказнасці і супольнай працы пры адрозненнях у падыходах. Агульная структура аб’ядноўвае людзей і ініцыятывы, якія ўжо дапамагаюць беларусам, абараняюць іх правы і развіваюць супольнасці, каб зрабіць гэтую працу больш узгодненай і выніковай.

Сустаршынямі абраныя Вольга Алейнік, Ксенія Палуэктава, Віталь Рымашэўскі і Дзяніс Садоўскі. Упершыню ў найноўшай гісторыі хрысціянскіх дэмакратаў сфармаваны парытэтны склад сустаршыняў — дзве жанчыны і двое мужчын.

Злева направа: Вольга Алейнік, Дзяніс Садоўскі, Ксенія Палуэктава і Віталь Рымашэўскі

Служэнне беларусам — у краіне і за яе межамі

«Беларуская салідарнасць / хрысціянскія дэмакраты» аб’ядноўвае практычную дапамогу людзям, развіццё беларускіх супольнасцяў, падтрымку самастойных ініцыятыў і працу над рашэннямі, якія адкрываюць беларусам новыя магчымасці ў Беларусі і за яе межамі.

«Чалавек важнейшы за сістэму: дзяржава, палітычныя і грамадскія структуры павінны служыць чалавеку, абараняць яго правы і дапамагаць яму самастойна будаваць сваё жыццё», — адзначаецца ў дэкларацыі, прынятай на канферэнцыі.

Каштоўнасная аснова арганізацыі — чалавечая годнасць, свабода і адказнасць, салідарнасць, плюралізм і субсідыярнасць — прыняцце рашэнняў як мага бліжэй да людзей, якіх яны датычаць. Дапамога павінна ўмацоўваць самастойнасць чалавека, а падтрымка ініцыятыў — пашыраць іх магчымасці, не пазбаўляючы ўласнага кіравання.

Галоўная задача — падтрымка беларусаў унутры краіны і за яе межамі, абарона іх правоў і прадстаўленне інтарэсаў. Практычная дапамога разглядаецца як неад’емная частка працы дзеля свабоднай, незалежнай і дэмакратычнай Беларусі. Людзі павінны мець магчымасць не толькі атрымліваць падтрымку, але і прапаноўваць уласныя рашэнні, ствараць ініцыятывы і ўплываць на парадак дня.

Прынцып «Ад дапамогі аднаму чалавеку — да рашэння праблемы для многіх» прадугледжвае спалучэнне індывідуальнай дапамогі з працай над сістэмнымі зменамі. Там, дзе з адной перашкодай сутыкаюцца многія, неабходныя збор фактаў, падрыхтоўка прапаноў і змена правілаў або адміністрацыйнай практыкі.

Прыярытэты на 2027–2028 гады

Стратэгічнымі прыярытэтамі вызначаныя абарона незалежнасці Беларусі, супрацьдзеянне гібрыдным пагрозам, спыненне рэпрэсій і вызваленне палітвязняў, абарона свабоды сумлення і рэлігійных супольнасцяў, захаванне беларускай мовы, культуры і нацыянальнай ідэнтычнасці.

Асобная ўвага будзе надавацца падтрымцы беларусаў, якія застаюцца ўнутры краіны, захаванню грамадскіх сувязяў і магчымасцяў бяспечнага ўдзелу з улікам рызык рэпрэсій. Арганізацыя выступае супраць ізаляцыі беларускага грамадства ад Еўропы, за пашырэнне адукацыйных, культурных і прафесійных кантактаў.

Аляксандр Кавалевіч, сябра Рады

Працягнуцца кампанія ў абарону правоў беларусаў у Польшчы і міжнародныя кампаніі салідарнасці з Беларуссю. Сярод практычных задач — развіццё сеткі ўзаемадапамогі, падтрымка былых палітвязняў і сем’яў з дзецьмі, жаночага, моладзевага і сеньёрскага кірункаў, пашырэнне псіхалагічнай дапамогі.

Асаблівы акцэнт зроблены на развіцці грамадскіх і сацыяльных ініцыятыў. Арганізацыя будзе дапамагаць самастойным камандам знаходзіць партнёраў, экспертаў, веды і рэсурсы, падтрымліваць адукацыйныя і культурныя праекты, ствараць магчымасці для новых лідараў. Задача такой падтрымкі — умацоўваць самастойнасць ініцыятыў, а не падпарадкоўваць іх адзінаму цэнтру.

Супрацоўніцтва будзе будавацца як сетка раўнапраўнага партнёрства, у якой каманды захоўваюць уласнае кіраванне і напрамкі дзейнасці. «Нам не трэба аднолькава думаць пра ўсё, каб супрацоўнічаць там, дзе нас аб’ядноўваюць агульныя каштоўнасці і ўзаемная карысць», — падкрэсліваецца ў прынятай дэкларацыі.

Канстанцін Акінчыц, сябра рады і сустаршыня МХД/ БМС

Плануецца пашырэнне магчымасцяў навучання, стажыровак і міжнародных абменаў. Інтэграцыя беларусаў у краінах пражывання павінна спалучацца з захаваннем нацыянальнай ідэнтычнасці, а веды, досвед і сувязі дыяспары — працаваць таксама на падтрымку суайчыннікаў унутры краіны і будучае развіццё Беларусі.

Важнымі задачамі застаюцца супрацоўніцтва дэмакратычных сіл, узмацненне ролі грамадзянскай супольнасці і Платформы палітычных партый, пашырэнне прадстаўніцтва розных супольнасцяў і ўплыву саміх беларусаў на прыняцце агульных рашэнняў.

Прывітанні партнёраў і працяг супольнай працы

Дзмітрый Кучук – старшыня Беларускай партыі «Зялёныя»

З прывітаннямі да ўдзельнікаў і ўдзельніц канферэнцыі звярнуліся депутаты  Еўрапейскага парламента і Сейма Польшчы,   а таксама прадстаўнікі беларускіх дэмакратычных партый — Беларускай партыі «Зялёныя», Беларускай сацыял-дэмакратычнай партыі («Грамада») і Партыі БНФ — Беларускага народнага фронту.  

Папярэдні сустаршыня і сябра рады Аляксандр Паршанкоў

17 кастрычніка таксама адбыліся з’езды «Маладых хрысціянскіх дэмакратаў» і жаночай арганізацыі. На моладзевым з’ездзе абралі новы склад Рады і трох сустаршыняў — Лізавету Жучкову, Уладзіміра Далецкага і Канстанціна Акінчыца, — а таксама зацвердзілі планы дзейнасці. Жаночая арганізацыя падвяла вынікі працы і вызначыла наступныя задачы.

18 кастрычніка праца працягнулася ў тэматычных рабочых групах. Удзельнікі абмяркоўвалі развіццё асобных кірункаў, узаемадапамогу і супольныя праекты. Сеньёрская група вызначала далейшыя крокі па развіцці свайго аб’яднання і падтрымцы беларусаў старэйшага пакалення.

«Беларуская салідарнасць / хрысціянскія дэмакраты» працягвае працу, якая аб’ядноўвае дапамогу канкрэтнаму чалавеку з адказнасцю за беларускую супольнасць і будучыню краіны. Арганізацыя адкрытая да супрацоўніцтва з людзьмі і ініцыятывамі, якія падзяляюць каштоўнасці чалавечай годнасці, свабоды, салідарнасці і незалежнасці Беларусі.

Каментары сустаршыняў

Ксенія Палуэктава

«Была вымушаная пакінуць Беларусь пасля пачатку крымінальнага пераследу за бясплатную псіхалагічную дапамогу пацярпелым ад рэпрэсій 2020 года. У Варшаве працягнула гэтую працу разам з камандай, арганізоўвала трэнінгі для жанчын, дапамагала сем’ям з дзецьмі.

Для гарамадска – палітычнай працы я чалек новы. Вельмі расчароўвала напачатку, калі назірала сваркі і спрэчкі паміж рознымі групамі беларускіх палітыкаў.  Ведаю што шмат маіх сяброў адыйшлі ад актыўнага ўдзелу з гэтай прычыны. Стома і выгаранне не павінны ператварацца ва ўзаемную варожасць. Салідарнасць павінна быць штодзённай практыкай. 

Ксенія Палуэктава, сустаршыня

Была вельмі ўражаная камандай хрысціянскіх дэмакратаў – іх практычнаму падыходу і скіраванасцю на дапамогу людзям і вынікі працы тут і цяпер. Бо людзі ўжо стаміліся чуть вылякія абяцанні каторя неспраўджваюцца. Трэба рабіць хацяб невялікія але дзейсныя крокі каторыя прыносяць выннік і карысць людзям. Буду развіваць жаночы кірунак і працаваць над пераадоленнем стэрэатыпаў, якія перашкаджаюць роўнаму ўдзелу жанчын. Плануем праграму псіхалагічнай падтрымкі актывістаў у эміграцыі і анлайн-кансультацыі для беларусаў унутры краіны з улікам іх бяспекі».

Вольга Алейнік

«За гэтыя гады мы стварылі шырокую сетку міжнародных кантактаў і партнёрстваў. Будзем выкарыстоўваць яе для падтрымкі Беларусі і беларусаў, прыцягнення ўвагі да нашай краіны і арганізацыі міжнародных кампаній салідарнасці.

Працягнем працу з еўрапейскімі інстытуцыямі і міжнароднымі арганізацыямі дзеля спынення рэпрэсій, падтрымкі палітвязняў, свабоды веравызнання і роўнасці правоў жанчын і мужчын. Абарону рэлігійных супольнасцяў мы рэгулярна ўздымалі ў дыялогу з Еўрапейскім парламентам і Еўрапейскай народнай партыяй — гэтую працу будзем узмацняць. Адначасова будзем адкрываць беларусам і беларускам магчымасці пераймаць у еўрапейскіх калег сучасныя практыкі дзяржаўнага кіравання, мясцовага самакіравання і развіцця недзяржаўных арганізацый».

Віталь Рымашэўскі

«Вельмі ўсцешаны тым, што новыя людзі далучаюцца да нашай працы, што беларусы не губляюць надзеі, ствараюць новыя ініцыятывы ў Біларусі і ў эміграцыі. Беларусь — там, дзе ёсць беларусы. Мы застаёмся адным народам — унутры краіны і за яе межамі. Наша задача — служыць беларусам: падтрымліваць людзей у Беларусі  і абараняць  правы беларусаў у выгнанні, дапамагаць суайчыннікам у эміграцыі. Будаваць Беларусь трэба тут і цяпер — праз узаемную падтрымку і супольныя справы.  Гатовыя падтрымаць».

Дзяніс Садоўскі

«Мы таксама разглядаем больш шырокае аб’яднанне розных ідэалагічных плыняў хрысціянскіх дэмакратаў.  Таксама вітаем з’езд які плануюць правесці нашыя калегі і паплечнікі 24 кастрычніка ў Беластоку. 

За два месяцы пастаянных кансультацый паміж нашай камандай і камандай Паўла Севрынца і Георгія Дмітрука зробленыя крокі насустрач, дасягнутая дамоўленасць аб адмове ад узаемных публічных нападак. Працуем над пагадненнем аб супрацоўніцтве. Розныя плыні гістарычна суіснавалі ў беларускай хрысціянскай дэмакратыі. Мы паважаем гэтыя адрозненні, бачым у калегах партнёраў і саюзнікаў, адкрытыя да аб’яднання з захаваннем унутранай дэмакратыі і плюралізму.

Дзяніс Садоўскі, сустаршыня

Спадзяемся ў 2027 год атрымаецца правесці супольную кампанію ўшанавання памяці ахвяр камуністычнага тэрору і палітычных рэпрэсій, абмяркоўваем магчымасць супольнага з’езда дзеля таго каб дзе плыні хрысціянскіх дэмакратаў працавалі больш шчыльна.  Сёння рэпрэсіі не дазваляюць правесці паўнавартасны партыйны з’езд з удзелам сябраў унутры краіны. Наша мэта — разам аднавіць дзейнасць Беларускай хрысціянскай дэмакратыі ў свабоднай Беларусі».

The post У Варшаве адбыўся сход «Беларуская салідарнасць / хрысціянскія дэмакраты» appeared first on Афіцыйны сайт Беларускай Хрысціянскай Дэмакратыі (БХД).

3 верасня ў Еўрапейскім парламенце ў Бруселі на слуханнях Падкамітэта па правах чалавека (DROI), прысвечаных пераследу рэлігійных меншасцяў у свеце, асобная ўвага была нададзеная сітуацыі ў Беларусі.

Старшыня Дэлегацыі Еўрапейскага парламента па адносінах з Беларуссю Малгажата Гасеўская ўзняла праблему пераследу вернікаў у краіне. У сваім выступе яна падкрэсліла, што пад ціскам і рэпрэсіямі беларускіх уладаў знаходзяцца хрысціяне розных канфесій.

Да слуханняў Institute for Development and Social Market in Belarus and Eastern Europe (IDSMBEE) падрыхтаваў спецыяльны аналітычны матэрыял аб становішчы рэлігійных супольнасцяў у Беларусі, заснаваны на маніторынгу па стане на 30 жніўня 2026 года. У ім адзначаецца, што ціск на рэлігійныя арганізацыі ўсё часцей ажыццяўляецца праз адміністрацыйныя механізмы: абавязковую рэгістрацыю, ліквідацыю рэлігійных арганізацый, дазвольны парадак для замежных святароў, абмежаванні публічнай рэлігійнай дзейнасці і прымяненне заканадаўства аб «экстрэмізме».

Пасля абавязковай перарэгістрацыі колькасць зарэгістраваных рэлігійных арганізацый скарацілася з 3 592 да 3 426. Усе тры раней зарэгістраваныя грэка-каталіцкія супольнасці Брэсцкай вобласці страцілі юрыдычны статус. У жніўні 2026 года суд прыняў рашэнне аб ліквідацыі нацыянальнага аб’яднання евангелічна-лютэранскіх супольнасцяў.

З пачатку 2026 года беларускія ўлады таксама адмовілі як мінімум 12 польскім каталіцкім святарам у магчымасці працягваць служэнне ў Беларусі. Зафіксаваныя выпадкі затрыманняў і пакаранняў вернікаў за мірную рэлігійную дзейнасць, а таксама прымянення «антыэкстрэмісцкага» заканадаўства ў дачыненні да рэлігійных дзеячаў і абаронцаў свабоды веравызнання.

Аналітычны матэрыял IDSMBEE:
https://idsmbee.org

У падрыхтаваных рэкамендацыях прапануецца ўзмацніць сістэмны маніторынг свабоды рэлігіі і перакананняў у Беларусі, дамагацца празрыстасці рашэнняў аб рэгістрацыі і ліквідацыі рэлігійных арганізацый, а таксама надаваць больш увагі абароне рэлігійных супольнасцяў і вернікаў.

Відэа выступу Малгажаты Гасеўскай на слуханнях Еўрапейскага парламента:

The post У Еўрапарламенце заявілі пра рэпрэсіі супраць хрысціян усіх канфесій у Беларусі appeared first on Афіцыйны сайт Беларускай Хрысціянскай Дэмакратыі (БХД).

У Еўрасаюзе адзначаюць, што Шаўкуноў сістэматычна распаўсюджваў пракрамлёўскую дэзінфармацыю, у тым ліку сцвярджэнні пра «нацызм» ва Украіне, адмаўляў суверэнітэт Украіны і апраўдваў расійскае ўварванне як «неабходнае», «абарончае» і «санкцыянаванае Богам». Таксама ў рашэнні ЕС гаворыцца, што праз пропаведзі, медыйныя платформы, дзяржаўныя культурныя праекты і збор сродкаў для расійскіх войскаў у акупаваным Крыме ён прасоўваў і падтрымліваў ваенныя дзеянні Расіі.

Рашэнне Еўрасаюза пракаментаваў сустаршыня аргкамітэта партыі «Беларуская хрысціянская дэмакратыя» Віталь Рымашэўскі. Паводле яго, уключэнне мітрапаліта Ціхана Шаўкунова ў санкцыйны спіс ЕС — важны, але толькі першы крок.

«У гэтых спісах павінен быць і патрыярх Кірыл Гундзяеў, бо менавіта ён з’яўляецца адным з ключавых суаўтараў і публічных праваднікоў чалавеканенавісніцкай ідэалогіі так званага “рускага свету”», — заявіў Рымашэўскі.

Ён падкрэсліў, што ідэалогія, якую прасоўвае вярхушка Рускай праваслаўнай царквы, «не мае нічога агульнага ні з Евангеллем, ні з хрысціянствам». Паводле палітыка, пад выглядам абароны праваслаўя людзям навязваюць імперскую, антычалавечую і антыхрысціянскую дактрыну, якая апраўдвае вайну, агрэсію супраць украінскага народа, акупацыю і гвалт.

«Вярхушка РПЦ не проста абслугоўвае пуцінскі рэжым. Яна актыўна ўдзельнічала ў стварэнні ідэалагічнага падмурка гэтай вайны. Прыкрываючыся царквой, яны падмянілі хрысціянскую веру прапагандай, а пастырскае служэнне — апраўданнем злачыннай агрэсіі», — адзначыў Рымашэўскі.

Ён лічыць, што патрыярх Кірыл таксама павінен быць унесены ў санкцыйныя спісы, а ідэалогія «рускага свету», якая падаецца пад выглядам рускага праваслаўя, павінна быць прызнаная экстрэмісцкай і чалавеканенавісніцкай.

Пры гэтым Рымашэўскі падкрэсліў неабходнасць выразна аддзяляць кіраўніцтва РПЦ ад тых святароў, багасловаў і вернікаў, якія, застаючыся ў Расіі або знаходзячыся ў выгнанні, выступаюць супраць вайны.

«Менавіта яны сёння захоўваюць хрысціянскае сведчанне, а не тыя, хто ператварыў царкву ў інструмент дзяржаўнай прапаганды і апраўдання гвалту», — заявіў Віталь Рымашэўскі.

Фотаздымак: «Белсат»

The post Віталь Рымашэўскі: «Патрыярх Кірыл павінен быць у санкцыйных спісах» appeared first on Афіцыйны сайт Беларускай Хрысціянскай Дэмакратыі (БХД).

Падставай для размовы стала канферэнцыя ў Еўрапейскім парламенце ў Бруселі, прысвечаная гібрыднай агрэсіі Крамля, яе практыкам і наступствам. У абмеркаванні ўдзельнічаюць дэпутаты Еўрапарламента, а таксама беларускія ўдзельнікі, прадстаўнікі Украіны і Малдовы.

Віталь Рымашэўскі адзначыў, што расейскае ўмяшанне даўно стала праблемай не толькі для краін Усходняй Еўропы, але і для дзяржаў Еўрапейскага звяза. Гаворка ідзе пра спробы ўплыву на выбары, інфармацыйныя атакі і іншыя інструменты ціску, якія Масква выкарыстоўвае супраць дэмакратычных грамадстваў.

У каментары таксама закранаецца ініцыятыва «Еўрапейскі шчыт дэмакратыі», накіраваная на распрацоўку механізмаў абароны еўрапейскіх краін і грамадзян ад гібрыдных пагроз.

Цалкам азнаёміцца з матэрыялам можна тут.

Фота: «Наша Ніва»

The post Гібрыдныя пагрозы Расеі: Віталь Рымашэўскі пра дыскусію ў Еўрапарламенце appeared first on Афіцыйны сайт Беларускай Хрысціянскай Дэмакратыі (БХД).

Спампаваць

The post Прынята канцэпцыя еўраінтэграцыі Беларусі як стратэгія развіцця і бяспекі appeared first on Афіцыйны сайт Беларускай Хрысціянскай Дэмакратыі (БХД).

Рэпрэсіўная сістэма ўжо прывяла да драпежных прысудаў, напрыклад, каталіцкім святарам Андрэю Юхневічу (13 гадоў), Генрыху Акалатовічу (11 гадоў) і праваслаўнаму святару Сяргею Рэзановічу (16 гадоў).

Нядаўнія папраўкі ў «Закон аб свабодзе сумлення і рэлігійных арганізацыях» прымушаюць усе суполкі да 5 ліпеня 2025 года перарэгістравацца на дыскрымінацыйных умовах і прадугледжваюць да двух гадоў пазбаўлення волі за дзейнасць без рэгістрацыі, што азначае магчымую крыміналізацыю хатняй малітвы.

Свабода веравызнання гарантуецца Канстытуцыяй Беларусі, Міжнародным пактам аб грамадзянскіх і палітычных правах (МПГПП) і больш шырокімі прынцыпамі Савета Еўропы.

Мы таму заклікаем беларускія ўлады:

адмяніць тэрмін перарэгістрацыі ў ліпені 2025 года і артыкул 193.1, які крыміналізуе дзейнасць нерэгістраваных груп;

вызваліць незаконна зняволеных святароў і ўсіх палітвязняў;

вярнуць канфіскаваныя месцы богаслужэння, у прыватнасці Чырвоны касцёл у Мінску, і спыніць умяшанне ў рэлігійную аўтаномію.

Мы таксама заклікаем органы Савета Еўропы і дзяржавы-чальцы маніторыць парушэнні, даручыць Спецыяльнаму пасланніку Еўрапейскага саюза па пытаннях свабоды веравызнання або пераканання правесці расследаванне ў межах міжнародных дамоваў, аказаць прававую і тэхнічную дапамогу ўразлівым супольнасцям і будаваць сеткі салідарнасці, каб беларусы маглі маліцца без страху.

Поўны тэкст заявы Вы можаце паглядзець тут

The post Дэлегаты ПАРЕ патрабуюць спыніць пераслед святароў і вернікаў у Беларусі appeared first on Афіцыйны сайт Беларускай Хрысціянскай Дэмакратыі (БХД).

📺 Глядзець відэа:

У новым роліку мы паказваем:
— як выглядае еўрапейскі шлях у рэальнасці — праз інстытуцыйную рэформу, незалежны суд, адукацыю, эканоміку, мясцовае самакіраванне;
— якія канкрэтныя змены патрэбныя Беларусі, каб вярнуцца да развіцця, годнасці і бяспекі;
— як выглядае дарожная карта еўраінтэграцыі на 10–15 гадоў, заснаваная на вопыце Грузіі, Малдовы і Украіны;
— як з дапамогай Праграмы Усходняга партнёрства Беларусь можа ўжо цяпер набліжацца да еўрапейскіх стандартаў.

🤝 Разам мы набліжаем Беларусь да свабоды і еўрапейскай будучыні.

The post 🎥 Новае відэа на YouTube-канале БХД: «Якім можа быць еўрапейскі шлях Беларусі і як да яго прыйсці? (частка 3)» appeared first on Афіцыйны сайт Беларускай Хрысціянскай Дэмакратыі (БХД).

У відэа мы разбіраем, што на самой справе азначае еўрапейская інтэграцыя для беларусаў. Не як палітычны лозунг, а як канкрэтныя змены ў эканоміцы, ахове здароўя, адукацыі, сацыяльнай палітыцы і якасці жыцця.

Мы параўноўваем шлях Беларусі і Польшчы за апошнія 30 гадоў:

Польшча абрала еўраінтэграцыю і павялічыла ВУП у 3 разы,

заробкі выраслі з €300 да €1400–1500,

сотні мільярдаў інвестыцый пайшлі ў інфраструктуру,

сярэдняя працягласць жыцця — на 6–10 гадоў вышэй, чым у Беларусі.

📊 У відэа вы знойдзеце факты, параўнальныя табліцы і простыя тлумачэнні:

што дае далучэнне да ЕС для грамадзян, прадпрыемстваў і рэгіёнаў;

як працуюць сацыяльныя гарантыі і медыцына ў краінах ЕС;

чаму інвестары ідуць туды, дзе ёсць празрыстыя правілы, справядлівы суд і павага да прыватнай уласнасці.

Мы таксама нагадваем: Беларусь — частка еўрапейскай цывілізацыі.
📜 Нашая гісторыя — гэта ВКЛ, магдэбургскае права, адукацыя ў Кракаве і Падуі.
⚖️ Нашы каштоўнасці — гэта годнасць чалавека, свабода сумлення, роля сям’і і салідарнасць — менавіта яны ляжаць у аснове сучаснага Еўрапейскага Саюза.

Еўраінтэграцыя — гэта вяртанне дадому. Гэта шанец жыць лепш у сябе, а не з’язджаць.

📣 Заклікаем паглядзець гэтае відэа ўсім, каму не абыякава будучыня Беларусі.
Будзем удзячныя за прагляд, лайк, каментар і распаўсюд сярод сяброў і калегаў.
Разам мы можам змяніць Беларусь — і вярнуць яе ў супольнасць свабодных, годных і моцных еўрапейскіх нацый.

The post «Еўраінтэграцыя — гэта не пра сцяг, а пра жыццё»: на канале БХД выйшаў новы відэаролік пра практычныя перавагі еўрапейскага выбару appeared first on Афіцыйны сайт Беларускай Хрысціянскай Дэмакратыі (БХД).

🟢 Моладзевая палітыка хрысціянскіх дэмакратаў — канцэпцыя, якая закранае актуальныя патрэбы беларускай моладзі, магчымасці самарэалізацыі, адукацыі, удзелу ў грамадскім жыцці і абароны правоў.
🔗 Праграмны варыянт №1
🔗 Альтэрнатыўны варыянт №2

🟣 Гендарная палітыка хрысціянскай дэмакратыі — канцэпцыя, якая спалучае павагу да годнасці асобы, прынцыпы роўнасці магчымасцей і ролю сям’і як асновы грамадства.
🔗 Прагледзець дакумент

🔵 Еўрапейская інтэграцыя Беларусі — канцэпцыя, якая тлумачыць каштоўнасны і палітычны выбар на карысць Еўропы, развіцця, бяспекі і чалавечай годнасці.
🔗 Прагледзець дакумент

Мы заклікаем усіх сябраў партыі, прыхільнікаў і экспертаў азнаёміцца з гэтымі канцэпцыямі і дасылаць свае прапановы, заўвагі і рэкамендацыі. Нам важна зрабіць гэтыя дакументы максімальна сучаснымі, глыбокімі і прыдатнымі да рэальнай палітычнай сітуацыі.

✉ Пішыце вашыя прапановы на партыйны e-mail: bchd.info@gmail.com

The post 💡 Тры новыя канцэпцыі для абмеркавання: моладзь, гендар, еўраінтэграцыя appeared first on Афіцыйны сайт Беларускай Хрысціянскай Дэмакратыі (БХД).

Сёння, 21 чэрвеня 2025 года, у выніку візіту спецыяльнага прадстаўніка ЗША Кіта Келага ў Мінск, улады Беларусі вызвалілі 14 палітычных зняволеных.

Беларускія хрысціянскія дэмакраты вітаюць на волі гэтых мужных людзей, якія з годнасцю прайшлі праз гады катаванняў, прыніжэнняў і несправядлівасці з боку рэжыму:
1. Сяргей Ціханоўскі — блогер і лідар апазіцыі
2. Наталля Дуліна — былы дацэнт БДЛУ
3. Ігар Карней — журналіст «Радыё Свабода»
4. Галіна Краснянская — 69-гадовая грамадзянка Беларусі і Швецыі
5. Акіхіра Гаеўскі-Ханада — анархісцкі актывіст
6. Кірыл Балахонаў — прадстаўнік «Саюза беларускага нацыянальнага шчыта»
7. Сяргей Шэлег — прадпрымальнік
8. Алан Рой — грамадзянін Эстоніі
(І яшчэ 6 чалавек, імёны якіх удакладняюцца.)

Гэта — важны крок. Гэта — сапраўды радасная падзея. Мы верым, што воля, мужнасць і вера гэтых людзей набліжаюць нашую агульную перамогу.

Але разам з тым мы нагадваем: у Беларусі за кратамі застаюцца тысячы палітвязняў. У апошнія месяцы рэжым актыўна запускае новыя палітычныя справы, масава кідае людзей у вязніцы, працягвае практыку катаванняў і маральнага знішчэння.

Мы патрабуем неадкладнага вызвалення ўсіх палітычных зняволеных без выключэння. У тым ліку, канечне, нашых лідараў — Паўла Севярынца, Змітра Дашкевіча — і іншых нашых герояў, якія нязломна трымаюцца за кратамі і застаюцца голасам свабоды нават у ізаляцыі.

Вызваленне, якое суправаджаецца прымусовай дэпартацыяй з уласнай краіны, — гэта яшчэ адзін злачынны акт. Гэта абраза для ўсіх беларусаў. Ніхто не мае права выганяць людзей з іх дома.

Беларусь — гэта не прыватная ўласнасць дыктатара і яго слуг. Беларусь — гэта наш агульны дом. Дом для кожнага беларуса, незалежна ад перакананняў, мовы, веравызнання ці месца жыхарства.

Мы верым. Мы ведаем. Беларусь будзе вольнай. Палітвязні выйдуць на волю.

Жыве Беларусь!

The post Прэс-рэліз Беларускай хрысціянскай дэмакратыі appeared first on Афіцыйны сайт Беларускай Хрысціянскай Дэмакратыі (БХД).