У Беларусі стартуе новы этап кампаніі ў абарону зачатага жыцця
У Мінску 14 красавіка прайшоў круглы стол «Разам для абароны жыцця», прымеркаваны да старту новага этапу кампаніі ў абарону зачатага жыцця. Папярэдні этап кампаніі праходзіў у 2012-2014 гадах і прывёў да скарачэння з дзесяці да двух сацыяльных паказчыкаў для правядзення абортаў, даў права лекарам адмаўляцца ад перапынення цяжарнасці і ўвёў абавязковае псіхалагічнае кансультаванне для жанчын, якія жадаюць зрабіць аборт.
Сёння, па дадзеных Міністэрства аховы здароўя, у Беларусі здзяйсняецца больш за 20 тыс. абортаў у год. Аднак, адзначыла адна з ініцыятараў пралайф-кампаніі, юрыст Вольга Кавалькова, гэтай лічбы давяраць нельга, бо часцяком медыкаментозны аборт проста не ўлічваецца. Па падліках рабіна Ігаэла Йегудзі, у краіне штогод здзяйсняецца 100 тыс. абортаў, перадае карэспандэнт Krynica.info.
Каб не дапусціць забойства зачатых дзяцей, і праводзіцца кампанія. Аднак заканадаўча забараніць аборты ў Беларусі ў бліжэйшы час не ўдасца, упэўненая Вольга Кавалькова. Так, паводле яе слоў, ва ўмовах сённяшняй беларускай бюракратыі, у Беларусі не ўдасца ні правесці рэферэндум накшталт вугорскага, які б гарантаваў абарону жыцця з моманту зачацця, ні выступіць з заканадаўчай ініцыятывай па забароне абортаў. Акрамя збору неабходных 450 і 50 тыс. подпісаў адпаведна, прыхільнікі пралайф могуць сутыкнуцца з шматлікімі бюракратычнымі перашкодамі, у выніку чаго прыкладзеныя вялікія намаганні папросту не дадуць выніку.
Ды і беларускае грамадства сёння не гатова падтрымаць забарону абортаў, лічыць ініцыятар кампаніі. «Для многіх гэта не праблема. Большасць лаяльна ставіцца да гэтага. З савецкіх часоў аборт ўспрымаецца як норма. А мы толькі пачынаем наш шлях. Калі б парламент у нас абіраўся і там былі хрысціяне, якія б прадстаўлялі нашы інтарэсы, то сітуацыя магла б быць іншай», – падкрэсліла Вольга Кавалькова.
«Што перашкаджае кіраўнікам канфесій, мітрапаліту ўжо цяпер кожны дзень дамагацца забароны абортаў?» – задаўся пытаннем кіраўнік грамадскага аб’яднання «У абарону жыцця і сямейных каштоўнасцяў» Альберт Казаран.
Разам з тым, адзначыла Вольга Кавалькова, кампанія 2012-2014 гадоў паказала, што механізм грамадскага ціску на ўладу – праз збор подпісаў, сустрэч з чыноўнікамі і дэпутатамі, інфармавання праз СМІ – працуе.
Ініцыятары новага этапу кампаніі ў абарону жыцця таксама прапанавалі прысутным ўзор звароту ў Палату прадстаўнікоў, Савет міністраў, Адміністрацыю прэзідэнта і Міністэрства аховы здароўя, які заклікае ўлады разгледзець магчымасць увядзення забароны на правядзенне абортаў у Беларусі, акрамя выпадкаў, калі існуе пагроза здароўю і жыццю маці. У выпадку немагчымасці прыняць гэтую меру, прапануецца скараціць тэрмін для правядзення абортаў пры адсутнасці медыцынскіх паказчыкаў да шасці тыдняў (сёння – 12), увесці абавязковы пяцідзённы перыяд чакання з моманту падачы заявы аб жаданні зрабіць аборт і накіроўваць жанчын на псіхалагічнае кансультаванне з інфармаваннем пра этапы ўнутрычэраўнага развіцця дзіцяці і магчымых наступствах аборту.
Акрамя таго, прапануецца для замужняй жанчыны прадугледзець абавязковую пісьмовую згоду мужа на аборт, выключыць усе сацыяльныя паказанні для перапынення цяжарнасці і забараніць усе віды рэкламы абортаў.
Пры гэтым было адзначана, што людзі, арганізацыі і канфесіі, для якіх непрымальна абмежаванне тэрмінаў для правядзення абортаў, змогуць збіраць подпісы пад прапановай іх поўнай забароны.
У сваю чаргу пралайф-актывістка Юлія Чырва прапанавала «біць па фінансах». У прыватнасці, яна прапанавала ўвесці практыку, калі лекару будзе больш выгадна захаваць цяжарнасць, а не зрабіць аборт. «Корань усякага ліха – срэбралюбства», – адзначыла яна.
Акрамя таго, актывістка выступіла за тое, каб аборт перастаў лічыцца медыцынскай паслугай, а таксама за забарону рэкламы ЭКА, пры якім забіваюцца многія аплодненыя яйкаклеткі, і аддзяленне абартарыяў ад радзільных аддзяленняў.
Гэтыя прапановы былі падтрыманы ўдзельнікамі круглага стала і таксама ўнесены ў тэкст звароту.
Акрамя збору подпісаў, кампанія ў абарону зачатых жыццяў прадугледжвае правядзенне круглых сталоў, шырокае інфармаванне СМІ. Таксама прапануецца скарыстацца магчымасцямі, якія даюць маючыя адбыцца парламенцкія выбары, у тым ліку ў правядзенні пікетаў, на якіх будуць падымацца і пытанні абароны жыцця.
У сваю чаргу, псіхолаг-кансультант, каардынатар праграмы для моладзі «Урокі жыцця» Таццяна Фірысюк прапанавала ўвесці пры хрысціянскіх канфесіях адказных за правядзенне пралайф-кампаніі.
Таксама гучалі прапановы правядзення тэматычных сустрэч, канцэртаў, мастацкіх пленэраў, выступаў «зорак» у абарону жыцця і гэтак далей. Была адзначана важнасць вяртання ў сістэму адукацыі выхаваўчай функцыі, арганізацыі аб’яднанняў юрыстаў і медыцынскіх работнікаў у абарону жыцця.
Афіцыйны старт кампаніі намечаны на травень гэтага года. Збор подпісаў, а іх плануецца сабраць каля 50 тыс., як чакаецца, будзе доўжыцца да канца верасня, які пачне працу новы склад парламента, у якім могуць апынуцца і прыхільнікі абароны жыцця. «Вераснем кампанія не сканчаецца. Усё толькі пачынаецца», – падкрэсліла Вольга Кавалькова.
