Цэрквы Беларусі заклікалі абараніць Курапаты і маліцца каля крыжоў
Сёння, 26 ліпеня, абаронцы Курапатаў разаслалі ў асноўныя хрысціянскія Цэрквы зварот з заклікам выступіць у падтрымку нацыянальнага мемарыялу і ладзіць малітвы ва ўрочышчы.
Тэкст звароту:
“Шаноўныя Прадстаяцелі!
У пачатку чэрвеня у ахоўнай зоне найбуйнейшага беларускага нацыянальнага некропалю Курапаты, дзе сталінскі рэжым у 1937-1941 гадах расстраляў, па розных ацэнках, ад 30 да 250 тысячаў нявінных людзей, з дазволу уладаў адчыніўся рэстаранна-забаўляльны комплекс “Поедем, поедим”.
Курапаты стаяць у адным шэрагу з Асвенцімам, Майданэкам, Катынню. Гэта адзін з самых вялікіх у Еўропе і свеце магільнікаў ахвяраў таталітарных рэжымаў.
З 31 мая гэтага года сотні актывістаў дэмакратычнага руху арганізавалі бестэрміновую варту пратэсту з патрабаваннем зачыніць рэстаранна-забаўляльны комплекс у Курапатах. Прадстаўнікі міліцыі штодня складаюць на ўдзельнікаў курапацкай абароны шматлікія адміністрацыйныя пратаколы, вынікам якіх робяцца суды, штрафы і арышты.
Мы звяртаемся да вас з заклікам выступіць супраць адкрыцця рэстаранна-забаўляльнага комплексу ў Курапатах, і памаліцца ля курапацкіх крыжоў.
Нацыянальны некропаль Курапаты – гэта сімвал пакутаў нашага народа, месца, у шанаванні якога выяўляецца мараль і грамадства ў цэлым, і кожнага грамадзяніна ў асобнасці.
Мы спадзяемся пачуць ваш голас у абарону Курапатаў, дзе кроў ахвяраў бязбожнага камуністычнага рэжыму дагэтуль кліча да Госпада.”
Сярод іншых, звароты дасланыя праваслаўнаму мітрапаліту Паўлу, каталіцкаму арцыбіскупу Тадэвушу Кандрусевічу, епіскапам найбуйнейшых пратэстанцкіх аб’яднанняў – кіраўніку пяцідзясятнікаў Сяргею Цвору, баптыстаў Леаніду Міховічу, поўнаевангельскіх цэркваў Леаніду Вараненку.
27 ліпеня плануецца накіраваць адмысловыя звароты юдэйскай і мусульманскай грамадам.
