Віталь Рымашэўскі: для Беларусі вельмі важная падтрымка Еўрапарламента
Сустаршыня Беларускай хрысціянскай дэмакратыі Віталь Рымашэўскі пракаментаваў рэзалюцыю Еўрапарламента, у якой быў асуджаны ціск на СМІ і журналістаў у Беларусі, а таксама выказаная падтрымка грамадзянскай супольнасці і ў цэлым дэмакратычным сілам.
Кажа Віталь Рымашэўскі:
«Для Беларусі вельмі важна тое, што Еўрапарламент на чале з Еўрапейскай народнай партыяй, фракцыяй большасці, займае прынцыповую пазіцыю, заснаваную на каштоўнасцях насуперак усім сучасным трэндам заплюшчваць вочы на парушэнні правоў чалавека ў нашай краіне.
Прынятая рэзалюцыя важная таму, што на яе павінны будуць арыентавацца і выканаўчыя структуры Еўрапейскага Саюза. Еўрапарламент заклікае Еўрапейскую службу знешніх дзеянняў паставіць праграмы дапамогі і супрацоўніцтва з уладамі ў залежнасць ад рэальных крокаў да дэмакратызацыі, уключаючы поўнае захаванне свабоды СМІ. Гэта вельмі важна і правільна, бо без выканання элементарных свабод ніякія эканамічныя рэформы ў Беларусі проста немагчымыя. Мы будзем разам з нашымі еўрапейскімі партнёрамі адстойваць свабоду слова Беларусі. Я заклікаю таксама дэмакратычных актывістаў і ўсіх грамадзян нашай краіны не забываць, што сёння працягваецца крымінальны пераслед незалежных журналістаў, іх выклікаюць на допыты, на іх аказваецца ціск. Трэба кожнаму па меры магчымасці падтрымаць журналістаў, якія трапілі пад рэпрэсіі».
