Адзінаму апазіцыйнаму мясцоваму дэпутату ў Беларусі 50 гадоў!
Валеру Білібуху, хрысціянскаму дэмакрату, адзінаму апазіцыйнаму мясцоваму дэпутату ў Беларусі з Бярозаўшчыны – пяцьдзясят!
Расказвае сустаршыня БХД Павел Севярынец:
“Пазнаёміліся мы з Валерам у 2013-м у Купліне, у спецкамендатуры, дзе я сядзеў за Плошчу – разам з бярозаўскімі сябрамі ён прыехаў у разгар “свіной чумы”. Улады пачалі гвалтам забіваць і забіраць гаспадарскіх свіней як быццам з нагоды хваробы. Вёскі бунтавалі. У роднай вёсцы Валеры з яго лёгкай рукі самазвалы, што вазілі з палёў збожжа, заблакавалі дарогу для машынаў, а людзі выгналі пешую райвыканкамаўскую брыгаду прэч.
Валер далучыўся да БХД. Праз год на сваёй акрузе ён стаў дэпутатам – за вылучэнца ад улады ніхто не галасаваў.
З той пары Валер адстойвае інтарэсы вяскоўцаў у Бярозаўскім раёне так, як не рабіў да яго хіба ніхто. Дарогі, лес, кар’ер для купання, якасць вады… Начальства вымушанае адступаць, бо за спінай у Білібухі людзі.
У 2018-м Валера зноў абіраюць падаўляючай большасцю галасоў – і ён робіцца адзіным апазіцыйным мясцовым дэпутатам у Беларусі.
Валер – сапраўдны змагар з роду тых, што абаранялі Радзіму пад Грунвальдам, Воршай і Мілавідамі.
У юбілей гадоў зычу Валеру Білібуху мужнасці, трываласці, здароўя і Божай ласкі.
Верым, можам, пераможам!”
