Віталь Рымашэўскі: Еўрапейская народная партыя заявіла аб неабходнасці змагацца разам з Украінай за свабодную Еўропу
18 лютага адна з найбуйнейшых партый Еўропы Еўрапейская народная партыя (ЕНП) выступіла з заявай: “Еўропа выступае за мір, бяспеку і свабоду”.
Гэту заяву пракаментаваў адзін з лідэраў Беларускіх хрысціянскіх дэмакратаў Віталь Рымашэўскі:
“Партнёры беларускіх хрысціянскіх дэмакратаў, Еўрапейская народная партыя, заявіла аб неабходнасці змагацца разам з Украінай за свабодную Еўропу. Беларускія хрысціянскія дэмакраты надзвычай рады таму, што такі магутны цвёрды заклік да адзінства і барацьбы прагучаў ад ЕНП. Мы спадзяемся, што прапанова Еўрапейскай народнай партыі будзе падтрымана ўрадамі краін Еўрапейскага Саюза і новыя выклікі дапамогуць Еўропе мабілізаваць сілы для большай падтрымкі і абароны Украіны, а таксама за змаганне за Беларусь разам з мільёнамі беларусаў, якія сёння выступаюць супраць рэжыму Лукашэнкі, супраць уцягнення Беларусі ў вайну. Мы працягнем нашу камунікацыю з нашымі еўрапейскімі партнёрамі, каб падобная стратэгія ўключала ў сябе не толькі Украіну, але і Беларусь. Беларусь – частка Еўропы. Беларусь не павінна быць аддадзена на разарванне пуцінскага рэжыму. Беларусы змагаюцца за сваю свабоду і незалежнасць і мы заклікаем еўрапейцаў да салідарнасці ў гэтай барацьбе. Хрысціянскія дэмакраты будуць заклікаць спыніць ізаляцыю беларускіх грамадзян ад Еўрапейскага Саюза. Мы будзем дамагацца рэальных крокаў для падтрымкі беларусаў, якія застаюцца ўнутры краіны і працягваюць змагацца за незалежнасць і дэмакратыю.”
Поўнты тэкст заявы лідэраў ЕНП:
Еўропа выступае за мір, бяспеку і свабоду
Еўропа стаіць разам з Украінай. Незаконная вайна агрэсіі Расіі не толькі прывяла да страшных ваенных злачынстваў, сотняў тысяч загінулых і параненых, а таксама жахлівых вымушаных перасяленняў, але і ставіць пад пагрозу бяспеку ўсёй Еўропы. Нам неабходны справядлівы і трывалы мір, які гарантуе бяспеку і свабоду Еўропы ў доўгатэрміновай перспектыве. У цяперашніх геапалітычных умовах няпэўнасці ўпэўненая ў сабе і самастойная Еўропа павінна тэрмінова ўзмацніць сваю бяспеку.
Вырашальная падтрымка Украіны
ЕНП цалкам прыхільная падтрымцы Украіны. Каб узмацніць перамоўную пазіцыю Украіны, кожная дзяржава-член ЕС павінна, у адпаведнасці са сваімі магчымасцямі, перагледзець магчымасць павелічэння паставак узбраення, асабліва высокатэхналагічнага, пры гэтым паважаючы нацыянальную бяспеку і палітыку абароны дзяржаў-членаў. Любое будучае міравое пагадненне павінна паважаць суверэнітэт Украіны і быць узгоднена з ёй за сталом перамоў. Нічога пра Украіну без Украіны, нічога пра Еўропу без Еўропы.
Інтарэсы Украіны – гэта інтарэсы Еўропы. Перамовы не могуць прывесці да абмежавання суверэннага права краіны выбіраць уласныя механізмы бяспекі, уключаючы ўступленне ў ЕС або NATO. Таксама яны не могуць пераглядаць бяспековую архітэктуру Еўропы. Любая пасляваенная сістэма бяспекі можа быць сфарміравана толькі з улікам інтарэсаў ЕС і яго дзяржаў-членаў. Бо толькі Еўропа здольная забяспечыць доўгатэрміновы мір і эканамічную будучыню для Украіны. Пагроза з боку Расіі застанецца і пасля заканчэння яе вайны агрэсіі, таму неабходна дасягнуць устойлівага і трывалага міру, які не дазволіць Расіі распачаць новую агрэсію.
Тым часам усе санкцыі супраць тых, хто падтрымлівае вайну Пуціна, павінны працягвацца і ўзмацняцца. Ваенныя злачынствы павінны расследавацца Міжнародным крымінальным судом.
Украіна належыць да Еўропы. Першыя раздзелы перамоўнага працэсу павінны быць цалкам завершаны да канца 2025 года.
Вырашальнае павелічэнне нашых абарончых магчымасцяў
Мы дасягнулі вырашальнага моманту ў калектыўнай бяспецы Еўропы. Гаворка ідзе не толькі пра Украіну – гэта значна больш глыбокі выклік нашай уласнай бяспецы. Сітуацыя патрабуе неадкладнага ўзмацнення абароны. Цяпер неабходныя спрашчэнне, стандартызацыя і эканомія маштабу. Важныя неадкладныя крокі:
Павелічэнне фінансавання абароны: нам неабходнае беспрэцэдэнтнае павелічэнне выдаткаў дзяржаў-членаў на абарону да 3% і вышэй, на аснове ўжо дасягнутых дамоўленасцяў. Для гэтага неабходна сумесна актываваць механізм выключэння з Пакта стабільнасці і росту кантраляваным і ўмоўным спосабам. Мы падкрэсліваем прыхільнасць да сумесных інвестыцый у абарону. Еўрапейскі інвестыцыйны банк (EIB) павінен перагледзець сваю палітыку крэдытавання, што стане моцным сігналам для прыватных банкаў.
Сумесныя закупкі і развіццё магчымасцяў: інвестыцыі павінны быць скіраваныя на еўрапейскія прыярытэты, у першую чаргу на абаронныя праекты агульнаеўрапейскай значнасці. Праграма EDIRPA паказала эфектыўнасць сумесных закупак неабходнага абсталявання: яны зніжаюць выдаткі і забяспечваюць эканомію маштабу. Гэтую мадэль варта масава пашырыць.
Інвестыцыі ў ваенную мабільнасць: перамяшчэнне войскаў і тэхнікі па Еўропе будзе мець ключавое значэнне ў бліжэйшыя гады. Дзяржавы-члены павінны задзейнічаць фонды згуртавання для патрэб ваеннай мабільнасці.
Спрашчэнне закупак: Заканадаўчы пакет “Omnibus” у галіне абароны павінен гарманізаваць правілы закупак, перамяшчэнняў унутры ЕС і ліцэнзавання.
Узмацненне супрацоўніцтва з саюзнікамі па-за ЕС: неабходна знаходзіць прагматычныя рашэнні для павелічэння тэхналагічнага, закупачнага і аператыўнага супрацоўніцтва з партнёрамі перад агульнымі пагрозамі.
Завяршэнне заканадаўчых ініцыятыў у сферы абароны: тэрмінова неабходна завяршыць Еўрапейскую абаронную прамысловую праграму, умацаваць супрацоўніцтва з украінскай абароннай прамысловасцю і закласці асновы еўрапейскага абароннага вытворчага рэжыму.
Стварэнне самастойнага Савета абароны і пастаяннага Камітэта абароны: цяпер як ніколі неабходна сканцэнтравацца на хуткім і эфектыўным прыняцці рашэнняў.
З дапамогай Польскага старшынства гэтыя тэрміновыя прыярытэты могуць быць рэалізаваны хутка.
Мы заклікаем да надзвычайных і інклюзіўных самітаў ЕС і NATO, каб прыняць рашучыя меры для павышэння стратэгічнай аўтаноміі ЕС, узмацнення яго абаронных магчымасцяў і стварэння еўрапейскага слупа ў NATO, які будзе здольны таксама дзейнічаць аўтаномна.
З тэкстам заявы таксама можна азнаёміцца на афіцыйным сайтце ЕНП: https://www.epp.eu/news/epp-informal-summit-statement
