Дзяніс Садоўскі: можна дакладна засведчыць, што АБСЕ гэтыя выбары не прызнала
Адказны сакратар аргкамітэту па стварэнні партыі “Беларуская хрысціянская дэмакратыя”, адзін з кіраўнікоў кампаніі назірання “Права выбару” Дзяніс Садоўскі заявіў bchd.info, што выніковая справаздача АБСЕ пра парламенцкія выбары ў Беларусі з’яўляецца даволі ўзважанай і дакладна дэманструе асноўныя факты фальсіфікацый і маніпуляцый з вынікамі выбараў.
“Яна паказвае, што патрэбныя сур’ёзныя рэформы выбарчай сістэмы, а таксама рэальныя змены праваўжывальнай практыкі. Краевугольным каменем прызнання выбараў па-ранейшаму застаюцца тры асноўныя этапы, якасць якіх улада з кожным годам толькі больш і больш пагаршае. Гэта прысутнасць у выбарчых камісіях прадстаўнікоў апазіцыі, якіх з кожным годам робіцца ўсё менш. Гэта датэрміновае галасаванне і маніпуляцыя з яўкай падчас дадзенага этапу. А таксама непразрысты падлік галасоў і закрытасць яго ад назіральнікаў”, – адзначыў ён.
“Такім чынам, можна дакладна засведчыць, што АБСЕ гэтыя выбары не прызнала, а ўлады па-ранейшаму фальсіфікуюць выбары”, – падкрэсліў адказны сакратар БХД.
