Кіраўніцтва Мінюста Польшчы пачула беларускіх актывістаў (фота)
31 студзеня адбылася двухгадзінная размова прадстаўнікоў беларускіх і міжнародных арганізацый з кіраўніком палітычнага аддзела міністэрства Юстыцыі Польшчы Пётрам Дардзінскім.
Сустрэча стала магчымая пасля агульнага звароту ў міністэрства прадстаўнікоў арганізацый Цэнтр “Супрацоўніцтва без межаў” Ігара Шчэкарэвіча, сябра Нацыянальнай Рады Беларускай Хрысціянскай Дэмакратыі Анатоля Міхнаўца і “Еўрапейскай Беларусі” Змітра Бародкі.
Беларускія актывісты абмеркавалі на сустрэчы тры галоўных пытання. Гэта пераслед на працягу 12 гадоў судом у Беластоку сябра БХД Андрэя Жукаўца, скандальнае рашэнне суда ў Быдгошчы аб фактычнай забароне бел-чырвона-белага сцяга на спартыўных мерапрыемствах у Польшчы і магчымасць скасавання дамовы аб беларуска-польскім прававым супрацоўніцтве па якому Беларусі былі выдадзеныя банкаўскія дадзеныя Алеся Бяляцкага.
Адзначым, што гэта не першая сустрэча на вышэйшым узроўні беларускіх актывістаў. 22 снежня 2011 года прадстаўнікі арганізацый сустрэліся з намеснікам генпракурора Польшчы Робертам Гернандам. Падчас сустрэчы былі абмеркаваны шматлікія факты парушэння правоў актывістаў беларускай апазіцыі з боку польскіх пракуратураў. Па выніках размовы, актывісты ацанілі яе як паспяховую.
